Consellos para idear un produto
Mente aberta: Evitade caer en estereotipos ou suposicións sobre o que "necesitan" ou “todo o que non poden facer” as persoas con discapacidade. A diversidade dentro de cada grupo é enorme.
Concentración, non dispersión: É mellor resolver unha barreira moi específica que vos permita encontrar unha solución concreta, que tentar solucionar moitas á vez dunha forma superficial.
Problema real, non imaxinario: Asegurádevos de que a barreira que elixades sexa un desafío real e frecuente para as persoas con esa discapacidade.
Pensar libremente: Sede imaxinativos, audaces e orixinais. Non hai ideas "parvas" na fase inicial da chuvia de ideas.
Simplicidade e funcionalidade: O produto debe ser práctico, fácil de usar e eficaz. Ás veces, a solución máis simple é a máis brillante.
Impacto a longo prazo: Podería este produto ter un impacto positivo duradeiro na vida das persoas?
A empatía como punto de inicio: Antes de pensar en solucións, é importante que entendades profundamente a barreira á que se enfronta unha persoa con discapacidade. Pensade como é o seu día a día e os retos que, diariamente, ten que superar. A empatía é o motor dunha boa idea para cambiar a sociedade.
Deseño universal: É un concepto de deseño que se enfoca en que o mellor deseño accesíbel é aquel que beneficia á maior cantidade de persoas, non só ao grupo específico de discapacidade. O deseño universal ten como principios proporcionar múltiples formas de representación, de implicación e de acción e expresión. Por exemplo, unha rampla é esencial para unha cadeira de rodas, pero tamén axuda a carriños de bebé ou persoas con maletas.
Viabilidade e sustentabilidade: Para comezar, buscade se a vosa idea xa se materializou no mercado. De ser así, procurade introducir unha mellora. En caso de ser unha idea orixinal e innovadora, pensade se é factíbel. Pensade en se o produto podería fabricarse e distribuírse de forma realista, alén do seu impacto ambiental.