O lecer é un dereito e está recoñecido para toda as persoas.

A propia Constitución, mesmo a Declaración dos Dereitos Humanos fai referencia “ao descanso e ao desfrute do tempo libre". O problema é que non sempre o lecer está configurado para ser inclusivo: transportes, infraestruturas na cidade ou no medio natural, incluso o deseño das propias actividades que se realizan:

Cando unha persoa con discapacidade ve limitado o seu lecer polo simple feito de ter unhas necesidades distintas, está sendo privada dun dereito fundamental.

O lecer inclusivo é o conxunto de actividades destinadas a conseguir que as persoas con discapacidade desfruten do seu tempo libre.

Para conseguir o seu desenvolvemento, existen chaves para garantir a accesibilidade universal ou contar con profesionais especializados que poidan organizar e coordinar as actividades que satisfagan as necesidades de cada persoa.

Pero non só está en mans dos expertos, senon que todos, con pequenos detalles e unha visión inclusiva da nosa contorna, podemos contribuír a que todos desfrutemos deste dereito.

Desde o Grupo Social ONCE traballamos por facer accesibles o lecer e a cultura a todas as persoas con discapacidade.

A ONCE, por exemplo, traballa por facer accesibles os espectáculos, o cine, os museos ou os videoxogos, e promove obradoiros, audicións, etc. para incentivar o lecer e a cultura das persoas con discapacidade visual.

Ademais, desde a Fundación ONCE promóvese o acceso á cultura e ao lecer para persoas con outras discapacidades, poñendo en marcha iniciativas similares.

Desde ILUNION, a súa división de turismo accesible conta con liñas de negocio enfocadas cara ao sector hoteleiro, a restauración e cara unha vertente lúdica e deportiva.

En España, existen ao redor de tres millóns de persoas cunha discapacidade superior ao 33%. Segundo o SEPE, a taxa de desemprego destas, é superior á da media da poboación sen discapacidade.

Isto significa que a día de hoxe, o acceso a un emprego é máis difícil para unha persoa con discapacidade que para unha sen ela... Un reto que debemos superar como sociedade.

O desenvolvemento profesional das persoas con discapacidade, ademais de outorgarlles unha autonomía e estabilidade económica, supón unha vía para integrarse na sociedade. Ao desempeñar un posto de traballo, demóstranse a si mesmas e ao resto, todo o que son capaces de facer, desmontando estereotipos.

Un dos factores que máis está axudando na inclusión laboral é a transformación dixital xa que permite omitir numerosas barreiras físicas e dar a posibilidade de que calquera poida traballar e formarse desde calquera parte.

Porén, por riba das posibilidades tecnolóxicas, o que termina marcando a diferenza nun emprego inclusivo, é o factor humano: recoñecer, como profesionais, a importancia da inclusión nos nosos equipos de traballo é o primeiro paso para facela realidade.

Desde o Grupo Social ONCE actúase incidindo na importancia da formación e procurando o compromiso dos axentes sociais que interveñen no mundo laboral.

A ONCE e a Fundación ONCE son axentes sociais xeradores de emprego, comprometidos coa creación de novos postos de traballo e realización de novas accións formativas para persoas con discapacidade de diversa índole.

Por outra parte, ILUNION é un modelo empresarial único, feito desde as persoas e para as persoas, cuxo obxectivo final é o de xerar emprego de calidade para as persoas con discapacidade. A mellor forma de lograr este obxectivo é desenvolvendo e profesionalizando liñas de negocio rendibles e sustentables que acheguen un servizo especializado, integral e de elevado valor aos ollos dos clientes.

A “accesibilidade universal e o deseño para todos” encárgase de que todos os produtos e servizos nunha contorna, e en xeral, sexan totalmente accesibles para todas as persoas, sen importar se teñen algún tipo de discapacidade ou non…

Isto inclúe desde as infraestruturas das cidades libres de barreiras arquitectónicas, como escaleiras, muros ou mala sinalización, ata o “acceso á información”: materiais educativos, trámites públicos, consultas de información (Internet, carteis e sinais, etc.) deseñados para que poidan ser entendidos e útiles para todas as persoas, de forma autónoma e segura.

Como cidadáns e parte dunha sociedade, nós tamén podemos facer máis accesible a nosa contorna, procurando que todos e cada un dos seus recunchos ofrezan solucións ás diferentes necesidades das persoas, con ou sen discapacidade.

Ao fin de contas, no día a día, a accesibilidade é máis unha cuestión de empatizar e ter ideas que faciliten a vida dos demais, máis que de empregar grandes recursos.

O Grupo Social ONCE ten como misión promover o deseño para todas as persoas e, así, lograr a accesibilidade universal como condición imprescindible para a igualdade de oportunidades das persoas con discapacidade.

Desde a ONCE ofrécense diversas ferramentas e recomendacións en materia de Tiflotecnoloxía e Tecnoloxía accesible.

A Fundación ONCE, pola súa parte, traballa para lograr que se establezan, coñezan e apliquen criterios e estándares á hora de deseñar, construír, adaptar e manter a contorna, a súa dotación, así como os produtos e servizos de forma que alcancen, manteñan ou melloren os seus niveis de accesibilidade.

A educación inclusiva é aquela que procura atender as necesidades de aprendizaxe de todos os nenos, nenas, mozos e adultos, con especial atención para aqueles que teñen algún tipo de necesidade especial.

Cada un de nós somos diferentes, por iso, necesitamos procedementos e formas de aprender diferentes. As persoas con discapacidade, tamén teñen as súas propias necesidades: acceso á información, ritmos de aprendizaxe, necesidade de formatos especiais que poidan ser percibidos por outras canles, etc.

Cando temos en conta as necesidades educativas para as persoas con barreiras para a aprendizaxe, conseguimos unha educación na que todos nos sentimos partícipes.

Na educación inclusiva é decisivo contar con bos profesionais dedicados, pero alcanzar unha educación onde ninguén se quede atrás é un reto que nos implica a todos.

Para isto, o Grupo Social ONCE ten como obxectivo conseguir a maior normalización e inclusión do estudante na contorna familiar, social e educativa.

Desde a ONCE impúlsase a inclusión educativa das persoas con discapacidade visual a través da firma de convenios con todas as administracións educativas das comunidades autónomas. Desta forma, os alumnos contan con todos os recursos do sistema ordinario e, alén diso, aqueles específicos da ONCE a través dos seus Centros de Recursos Educativos (CRE), que prestan servizos de atención directa e servizos complementarios.

Ademais, desde a Fundación ONCE apóstase polo acceso e a promoción das persoas con discapacidade na educación superior, para o que resulta imprescindible construír universidades inclusivas que garantan a igualdade de oportunidades.