Preguntas do minuto 11:11: parar para imaxinar
Se unha persoa non puidese ver nada, como sabería que hai diante dela sobre unha mesa? Como se movería con seguridade por un espazo novo? Como podería elixir a roupa que quere poñerse para ir ao instituto?
Imaxina que non podes usar as túas mans ou brazos para nada. Como poderías abrir unha porta, prender a luz, responder a unha mensaxe no teu teléfono ou preparar a túa mochila para ir á escola?
Se non puideses ouvir absolutamente nada, como te decatarías de que alguén chama polo teu nome? Como saberías se o autobús que esperas chegou? Como te decatarías de que soou o timbre do cambio de aula? Como te decatarías do que se está explicando na aula? E como poderías comprender o que che di o teu mellor amigo ou amiga nun audio de WhatsApp?
Pensa en algo tan simple como un vaso de auga. Se tiveses dificultades para te moveres ou para controlar os teus movementos, como poderías beber sen derramar auga? Como poderías evitar que se che caian os flocos de millo no cinema se non podes controlar o movemento das túas mans e brazos?
Que pasaría se a información só se presentara dunha maneira (por exemplo, só como texto nunha pantalla, ou só como audio nun anuncio)? Como poderías asegurarte de que todos a entendan? E cando a información é complexa e está desordenada?
Se tiveses que usar un obxecto cotián (un bolígrafo, unhas tesoiras, un mando a distancia) sen usar os teus dedos, como o redeseñarías para que fose útil?
Que sons ou sinais visuais poderías engadir a algo que xa existe para que sexa máis fácil de usar ou detectar para alguén cunha discapacidade sensorial?
Se un amigo ou unha amiga con unha discapacidade específica viñese á túa casa para xogar, que lle preocuparía facer? Como adaptarías os teus xoguetes ou as túas actividades para que puidese gozar plenamente?
Pensa en algo que a xente dá por seguro, como o feito de subir escaleiras ou asinar un documento. Como poderías facer que esa acción sexa posíbel para alguén cunha limitación física?
Se tiveses que explicar algo complexo a alguén cunha discapacidade cognitiva, como cambiarías a forma en que presentas a información para que fose clara e sinxela?